A pesar de 2 meses de folga das Letradas de Xustiza e do escudo social, os desafiuzamentos continúan: 6.579 no primeiro trimestre

O Consello Xeral do Poder Xudicial fixo públicos os datos correspondentes ao primeiro trimestre deste ano e os desafiuzamentos alcanzan xa a cifra de 6.579, dos cales 1.308 foron consecuencia de execucións hipotecarias, 4.860 consecuencia da LAU e 411 por outras causas.

Que nun trimestre no que as Letradas da Administración de Xustiza estiveron 2 meses de folga, deixando sen executar moitas decenas de miles de accións xudiciais, e no que, ademais, estaba vixente o decreto de escudo social, que o número de desafiuzamentos só baixase en 2.402 con respecto ao anterior, pon outra vez de manifesto a vulnerabilidade das persoas fronte aos desafiuzamentos e a insuficiencia das leis para protexer o Dereito á Vivenda.

Como é sabido, na recente lei de vivenda non se incluíron as medidas que reclamabamos para protexer a persoas vulnerables, como a prohibición de calquera desafiuzamento sen alternativa habitacional, ou o alugueiro social obrigatorio para grandes tenedores. Só se incluíron medidas que alongan os procedementos, pero cuxa posta en marcha depende das Comunidades Autónomas. Co envorco dado en moitas destas CC. AA. e a decisión clara do PP de derrogar ou incumprir esa lei, o panorama escurécese aínda máis. E se a isto engadímoslle que o decreto do escudo social vence o próximo día 30, o que virá é desolador.

Por iso, desde a PAH esiximos ao goberno actual, a mellora e prórroga do devandito decreto, que pode ser validado pola Deputación Permanente do Congreso, para garantir un mínimo de continuidade na protección social. E ao seguinte goberno, que reforme de inmediato a lei de vivenda, para incluír esas medidas de protección, e facela de obrigado cumprimento en todo o territorio.

A PAH imos seguir loitando para conseguilo.
Si se pode!